अग्निजन्य हिँसा प्रभावितलाई अभिमुखिकरण

बटुकनाथ झा, जनकपुरधाम, २६ गते मंसिर । मधेश प्रदेशका अग्निजन्य हिँसा प्रभावितहरुलाई एक दिने अभिमुखिकरण जनकपुरधाममा सोमबार सम्पन्न भएको छ । विभिन्न कारणले अग्निजन्य हिँसाको सिकार भएका प्रदेशका धनुषा, महोत्तरी र सर्लाही जिल्लाका १६ जनालाई एक दिने अभिमुखिकरण तालिम प्रदान गरिएको छ । अग्निजन्य हिँसाका प्रभावितका क्षेत्रमा काम गरिरहेको संस्था विभीएस नेपाल तथा एक्सन एडको संयुक्त आयोजनामा भएको सो अभिमुखिकरणमा नेपाल सरकारले यस्ता प्रभावितहरुका लागि संचालन गरेको परियोजनाका बारेमा बिभिएस नेपालका कार्यक्रम संयोजक दिपेन्द्र तिवारीले जानकारी गराउनु भएको थियो । उहाँले अग्निजन्य हिँसा प्रभावितहरुका लागि सरकारको तर्फबाट उपलब्ध स्रोत साधनका बारेमा जानकारी गराउदै अहिले सम्म यस्ता प्रभावितका लागि संस्थाले गरिरहेको कामका बारेमा समेत जानकारी गराउनु भएको थियो । एक वर्षमा मधेश प्रदेशमा ९० जना अग्निजन्य हिँसाको सिकार भएको कार्यक्रम संयोजक तिवारीले जानकारी दिनुभयो । यस्ता अग्निजन्य हिँसाका प्रभावितहरुलाई निःशुल्क रुपमा उपचारको समेत व्यवस्था रहेको उहाँले जानकारी दिनुभयो । उक्त अभिमुखिकरणमा सहभागीहरुलाई अधिवक्ता अरुण कुमार यादवले एसिड तथा अग्निजन्य अपराध संग सम्बन्धीत कानुनी प्रावधान र उपचारको अवस्थाका बारेमा प्रशिक्षण दिनुभएको थियो । लैँगिक तथा महिला हिँसाका कारण अग्निजन्य हिँसा भईरहेपनि चाडपर्वको बेला समेत यस्ता घटना भईरहेको देखिन्छ । सतर्कता नअपनाइए पर्वको बेलामा यस प्रकारका घटनाहरु भईरहेको कार्यक्रम संयोजक तिवारीले जानकारी दिनुभयो । अग्निजन्य हिँसाका प्रभावितहरुलाई बरिष्ठ मनोविद तथा बिभीएस नेपालका मनोपरामर्शकर्ता पदम् प्रसाद घिमिरेले मनोपरामर्श प्रदान गर्नुभएको छ । यता, किर्तिपुर वर्नहस्पिटल काठमाडौँका प्रा. डा. शंकरमान राई तथा डा. किरण पौडेलले प्रादेशिक अस्पताल जनकपुरधामका अग्नि प्रभावितहरुको उपचारमा लंलग्न रहेका डाक्टर तथा स्वास्थ्यकर्मीहरुलाई समेत प्रशिक्षण दिनुभएको छ ।