अमिशा माथि भएको “साइबर हमलामा उजुरीपछि रौतहटबाट युवक पक्राउ, सामाजिक सञ्जाल नियमन गर्न ब्यूराे एक्शनमा : JCNEPAL MEDIA

7 महीना पहिले

चैत २२,२०८२ / जेसी नेपाल संवाददाता

काठमाडौं : सामाजिक सञ्जालमार्फत हुने दुर्व्यवहार र साइबर बुलिङको गम्भीर रूप फेरि एकपटक सतहमा आएको छ।

युवती अमिशा पराजुलीमाथि लक्षित गरी गरिएको अपमानजनक टिप्पणी र अनलाइन आक्रमणको घटनामा प्रहरीले एक जनालाई पक्राउ गरेको छ, जसले साइबर अपराधको बढ्दो चुनौतीलाई मध्य नजर गर्दै सामाजिक सञ्जाल नियमन गर्न ब्यूराे एक्शनमा आएको छ । केन्द्रीय साइबर ब्यूरोको टोलीले अमिशा पराजुलीले दिएको उजुरीका आधारमा रौतहटको गुजरा क्षेत्रबाट अभिषेक चौधरीलाई शनिबार बिहान नियन्त्रणमा लिएको हो।

पक्राउ परेका चौधरीलाई थप अनुसन्धानका लागि काठमाडौंस्थित साइबर ब्यूरो कार्यालयमा ल्याउने तयारी भइरहेको प्रहरीले जनाएको छ। यो घटनाको जरो एक सार्वजनिक अभिव्यक्तिसँग जोडिएको छ। नेकपा (एमाले) का अध्यक्ष केपी शर्मा ओली पक्राउबारे अमिशा पराजुलीले आफ्नो धारणा सामाजिक सञ्जालमार्फत सार्वजनिक गरेकी थिइन्। उनको उक्त अभिव्यक्तिपछि सामाजिक सञ्जालमा एकाएक प्रतिक्रिया आउन थाले, जसमा कतिपयले असहमति जनाए भने केही प्रयोगकर्ताले मर्यादा नाघेर अपमानजनक र आक्रामक टिप्पणी गर्न थाले। यिनै नकारात्मक र अपमानजनक टिप्पणीहरूले साइबर बुलिङको रूप लिँदै गएपछि अमिशाले आफू मानसिक रूपमा पीडित भएको बताउँदै प्रमाणसहित केन्द्रीय साइबर ब्यूरोमा उजुरी दर्ता गराएकी थिइन्।

प्रहरीका अनुसार प्रारम्भिक अनुसन्धानका क्रममा चौधरीको संलग्नता देखिएपछि उनलाई पक्राउ गरिएको हो। डिजिटल प्रमाणहरू संकलन गरी थप अनुसन्धान अगाडि बढाइएको छ। एक प्रहरी अधिकारीका अनुसार, “सामाजिक सञ्जालको दुरुपयोग गरी कसैलाई मानसिक यातना दिनु गम्भीर अपराध हो। यस प्रकरणमा संलग्न जो–कोहीलाई पनि कानुनी दायरामा ल्याइनेछ।” चौधरीलाई काठमाडौं ल्याएर विस्तृत सोधपुछ गरिने र प्रचलित कानुनअनुसार कारबाही प्रक्रिया अघि बढाइने बताइएको छ।नेपालमा पछिल्लो समय सामाजिक सञ्जालको प्रयोग तीव्र रूपमा बढेसँगै साइबर बुलिङका घटनाहरू पनि बढिरहेका छन्। विशेषगरी महिलाहरू र सार्वजनिक रूपमा आफ्नो धारणा व्यक्त गर्ने व्यक्तिहरू यसका मुख्य सिकार बन्दै आएका छन्।

साइबर बुलिङले केवल अनलाइन दुर्व्यवहारमा सीमित नरही मानसिक स्वास्थ्यमा गम्भीर असर पार्ने, आत्मसम्मान घटाउने र कहिलेकाहीँ आत्महत्यासम्मको जोखिम बढाउने खतरा समेत रहने मनोविद्हरू बताउँछन्। कानुनी प्रावधान के भन्छ? नेपालको विद्यमान कानुनअनुसार सामाजिक सञ्जालमार्फत कसैको मानहानी गर्ने, धम्की दिने वा मानसिक यातना दिने कार्य दण्डनीय अपराध हो। इलेक्ट्रोनिक कारोबार ऐन, २०६३ अन्तर्गत यस्तो कार्यमा संलग्न व्यक्तिलाई जरिवाना तथा कैद सजायसम्म हुन सक्छ।

यस घटनाले फेरि एकपटक डिजिटल नागरिकता र जिम्मेवार अभिव्यक्तिको आवश्यकता औंल्याएको छ। सामाजिक सञ्जाल स्वतन्त्र अभिव्यक्तिको माध्यम भए पनि त्यसको दुरुपयोगले अरूको जीवनमा गम्भीर असर पार्न सक्छ भन्ने बुझ्न आवश्यक देखिएको छ।अमिशा पराजुलीको साहसिक कदमले साइबर बुलिङविरुद्ध आवाज उठाउनेहरूलाई प्रेरणा दिएको छ भने प्रहरीको सक्रियताले यस्ता अपराधमा संलग्नलाई कारबाहीको सन्देश पनि दिएको छ।

प्रकाशित : चैत २२,२०८२               ००:००

यो खबर पढेर तपाईलाई कस्तो महसुस भयो ?

फेसबुकबाट तपाईको प्रतिक्रिया !


सम्बन्धित समाचार

पत्रकार नियन्त्रणमा लिएपछि मध्यराति प्रहरीको स्पष्टीकरण : सही मनसायले बोलाएका हौं : JCNEPALMEDIA

मधेस सरकारमा एमालेको समर्थन गुमाएपछि मुख्यमन्त्री यादवका लागि बहुमत जुटाउनु चुनौतीपूर्ण : JCNEPALMEDIA

निर्वाचनको एक साता अघि डेमोक्र्याटिक सांसद द्वारा डोनाल्ड ट्रम्पमाथि बलात्कारको आरोप : JCNEPALMEDIA

रथी बढुवाका लागि थापाको नाम सिफारिस, प्रधानसेनापति हुने रोलक्रममा अघि : JCNEPALMEDIA

अदालतको आदेश विपरीत बढुवा सिफारिस गर्ने प्रदेश लोक सेवा आयोग अध्यक्ष गुरागाईँले दिए पदबाट राजीनामा : JCNEPALMEDIA

मधेश प्रदेशमा १६८ (३) अनुसार जसपाको सरकार बन्न सक्ने, सरोज यादव मुख्यमन्त्री बन्दा एमाले र जनमतको समर्थन रहने : JCNEPALMEDIA