कालापानी वनक्षेत्रमा बस्ती हटाउने प्रयासपछि बर्दिबास तनावग्रस्त, वनकाे गाडी जलाइए, राजमार्ग अवरुद्ध : JCNEPALMEDIA

8 घन्टा पहिले

जेष्ठ १२,२०८३ / जेसी नेपाल संवाददाता

महोत्तरी : महोत्तरीको बर्दिबास नगरपालिका–३ स्थित कालापानी क्षेत्रमा बस्ती हटाउने प्रशासनको प्रयासपछि स्थानीयवासी आन्दोलनमा उत्रिएका छन् ।

आन्दोलनका कारण पूर्व–पश्चिम राजमार्ग तथा बीपी राजमार्ग प्रभावित हुँदा सयौं सवारी साधन बीच बाटोमै रोकिएका छन् भने यात्रुहरू समस्यामा परेका छन् । प्रशासनले करिब ५० वर्षदेखि बसोबास गर्दै आएको भनिएको कालापानी वन क्षेत्र खाली गराउने तयारी थालेपछि स्थानीयवासी विरोधमा उत्रिएका हुन् । सोमबार साँझ बस्ती खाली गराउने विषयमा सूचना दिन पुगेका वन कर्मचारीलाई स्थानीयले राति अबेरसम्म नियन्त्रणमा राखेका थिए ।

त्यसपछि स्थानीयले रातिदेखि नै बीपी राजमार्ग अवरुद्ध गर्दै प्रदर्शन सुरु गरेका हुन् । आन्दोलनका क्रममा प्रदर्शनकारीले वन कार्यालयको एउटा गाडीमा आगजनी गरेका छन् । डिभिजन वन कार्यालय महोत्तरीका प्रमुख अजयकुमार मिश्रका अनुसार आगजनीबाट गाडी पूर्ण रूपमा जलेर नष्ट भएको छ । घटनापछि क्षेत्रको सुरक्षा अवस्था थप संवेदनशील बनेको छ । प्रहरीले हस्तक्षेप गरी राति अवरुद्ध सडक खुलाउनुका साथै स्थानीयको नियन्त्रणमा रहेका वन कर्मचारीलाई उद्धार गरेको जनाएको छ ।

तर मङ्गलबार बिहानदेखि पुनः स्थानीयले सडक अवरुद्ध गर्दै प्रदर्शन जारी राखेका छन् । पूर्व वडा सदस्य तथा स्थानीय युवा नेता गणेश बस्नेतले वैकल्पिक व्यवस्थाबिनै बस्ती हटाउन खोजिएकाले स्थानीय आन्दोलित भएको बताए । स्थानीयवासीले आफूहरू वर्षौंदेखि बसोबास गर्दै आएको ठाउँबाट जबर्जस्ती हटाउन खोजिएको भन्दै विरोध जनाएका छन् । वडा अध्यक्ष विराट विष्टले बसोबासको सुनिश्चितता नभएसम्म आन्दोलन नरोकिने बताए । “सरकार र प्रशासनबाट बस्ती नउठाउने स्पष्ट प्रतिबद्धता नआएसम्म आन्दोलन जारी रहन्छ,” उनले भने । स्थिति तनावग्रस्त बनेपछि कालापानी क्षेत्रमा ठूलो संख्यामा प्रहरी परिचालन गरिएको छ । प्रशासनले सडक खुलाउने प्रयास गरिरहेको भए पनि स्थानीयको विरोधका कारण अवस्था सामान्य बन्न सकेको छैन ।

आन्दोलनकारी र सुरक्षाकर्मीबीच केहीबेर तनावपूर्ण अवस्था सिर्जना भएको प्रत्यक्षदर्शीहरूले बताएका छन् । इलाका प्रहरी कार्यालय बर्दिबासका डीएसपी गुरुप्रसाद तिम्सिनाले हाल स्थिति नियन्त्रणमै रहेको बताए । उनका अनुसार राति नियन्त्रणमा लिइएका केही प्रदर्शनकारीलाई पछि नगरप्रमुख प्रह्लाद क्षेत्रीको जिम्मामा छाडिएको हो । स्थानीयले माग सम्बोधन नगरी बल प्रयोग गरेर हटाउन खोजिए थप सशक्त आन्दोलन गर्ने चेतावनी दिएका छन् । उनीहरूले वार्तामार्फत समस्या समाधान गर्न सरकारसँग आग्रह गरेका छन् ।

प्रकाशित : जेष्ठ १२, २०८३              ००:००

यो खबर पढेर तपाईलाई कस्तो महसुस भयो ?

फेसबुकबाट तपाईको प्रतिक्रिया !


सम्बन्धित समाचार

जनकपुरका मेयर मनाेज साहले कन्या मावि जनकपुरलाई पूर्णरुपमा महिला विद्यालय बनाउने गरे निर्णय : JCNEPALMEDIA

७ वटा स्पा तथा मसाज सेन्टरमा प्रहरीले छापा मार्दा ३ युवती पक्राउ : JCNEPALMEDIA

जनकपुरकाे प्रादेशिक अस्पतालमा डाक्टरहरू पेनडाउन गर्दा विरामीहरू आन्दोलीत, अवस्था तनावग्रस्त : JCNEPALMEDIA

पप्पु कन्ट्रक्सन प्रा.लि.का सञ्चालक सुमित रौनियारलाई पक्राउ पूर्जी जारी : JCNEPAL MEDIA

जनकपुरधाम प्रादेशिक अस्पतालका दुई चिकित्सक निलम्बित, लापरवाही आरोपपछि ९ बुँदे सहमति : JCNEPALMEDIA

काभ्रेपलाञ्चोकमा कार्यरत इन्सपेक्टर यादव बैशाख महिनाको उत्कृष्ट प्रहरी घोषित : JCNEPALMEDIA